WARTA SUNDA NUSANTARA - GRUP MAJALAH WARTA SUNDA

WILUJENG WENGI, KOTA BANDUNG (Ku : Yayat Hendayana) Wilujeng wengi, kota Bandung, wilujeng wengi. Peuting ieu kuring hayang tibra sare lantaran ti beurang anjeun geus ngahadiahkeun sumanget gawe, ngahanca garapan anu can rengse, nyaeta kamerdekaan sabangsa kuring sangkan leupas tina jajahan kejo sapiring. Wilujeng wengi kota Bandung, wilujeng wengi mun nenjo kuring saparakanca tong dipake  leutik hate da anjeun teu salah teusing.  Nu salah mah pangeusina, loba keneh nu api-api teu ngarti nu kumaha ari sugema sarerea. Wilujeng wengi kota Bandung, wilujeng wengi. Peuting ieu kuring hayang tibra sare sugan bae  bakal datang hadiah ngimpi dahar ngeunah sangkan isukan gede tanaga keur ngagibrigkeun kasusah 1966 (tina buku kumpulan sajak "Sasambat") NGIRING MIELING TEPUNG TAUN KOTA BANDUNG TAUN 2020

AMUK CICURUG Ku : Asép Somantri lain amuk nu teu puhpuguh pajarmanéh teu tata pasini lain...lain kitu tanyakeun ka hulu wotan girangna ka sunggapan prak pénta balakana pasti... lain dadak sakala amuk cicurug balukar lampah salah ramo-ramo jelema sarakah mupujuhkeun hawa napsu paseuk bumi dicabut lantakan puguh gunung ditugaran ampar sagara katut rawa diarugan dongéng nini ti buyutna "Ngaing hamo ngalaman Cicurug ngamuk!" "Lantaran Ngaing jeung Cicurug silih puhapékeun!"

Ambu Sumedang.* KAKAWIHAN & SISINDIRAN JAMAN JEPANG  Kintunan : Ambu Sumedang Kakawihan Jaman Jepang  Éhon bérod, Éhon bérod, Éhon bérod roda sapi buntung, tunggir hayam bikang, kangkung sisi gawir, Wira dagang oncom, comél anu gélo, lodong kosong ngentrung, trung-trung-trung kohkol alarem. Sisindiran Jaman Jepang  Cau raja cau ambon, Cau lampung cau batu, Boga raja urang Nippon, Urang kampung henteu nyatu. Melak jarak jeung kaliki, Diatur di sisi jalan, Keur harak sagala beuki, Paré batur dikunjalan. Ngala acung ngala ileus, Diiring ku tatabeuhan, Gering nangtung awak leuleus, Katambah ku babareuhan. Sukaréla modél Jepang Diiring serdadu Syantung, Mun béla ulah kapalang, Abdi eukeur nuju bingung. Gulali kuéh kelepon, Jawadah awur-awuran, Ustrali éléh ku Nippon, Henteu weléh tatambalan. Hirup kumbuh gotong-royong, Bekerja bersama-sama, Hirup ripuh beuteung kosong, Bujalna ka mana-mana. (Peranan Ramalan Dojobojo dalam Revolusi Kita, 1966).