ANTAWIS SUJANG JEUNG YOUTUBER
Ku : Asép Eri
"Sasajééénnnn ..., sasajéén ..., sasajénnn ... haréwos haroshos jurig bungkeuleukan geus 3 poé teu sirikna nunutur wae Sujang, tadina mah teu pati diwaro komo bari sok mantangul asa aing, ari diwaro pamentana araranéh, beuleum peda beureum téa, cai kalapa héjo téa, rurujakan téa, kopi pait jeung sajabana antukna kalah ngadoreksakeun, hutang di warung ngajedig urut unjak anjuk jeung laladang paménta jurig, dipikir deui mah mening hirup normal jiga batur teu boga kaleuwihan bisa ningali sabangsaning lelembutan, jurig jarian marakahayangan, lieur! Katambah hirup ngabujang teu boga pacabakan!
Geleber Nyi Kunti ninggalkeun dahan panumpian. Nyirorot muru nu keur ngariung handapeun caringin tukangeun astana tungtung lembur. Jamotrot. Paroman teu béda jeung nu geus araya di dinya, euweuh nu bérag.
“Meunggeus. Moal anggeus ku gudad-gadeud urusan kieu mah,” ceuk nu buukna cawigwig semu ngirung, pakéan teu matut, sarowéh bari pinuh ku japah.
“Ayeuna mah nu kudu dipikiran kumaha narékahanana sangkan manusa daek sieun jeung keueung deui ka bangsa urang! Ceuk nu beungeutna ruksak awak jiga leupeut dibakutet boéh, Pamanggih kuring mah cekék salah saurang jalma atawa urang marakayangan di lembur! Ganggu nu liwat! Asupan kabéh jalma nu kurang iman méh aya kasurupan masal! Ulah ngantep manéh! Kalakuan bangsa manusa geus leuwih édan batan bangsa urang! Tingali bangsa urang jadi hapa teu boga sima, euweuh nu sieun jeung ajrih ka bangsa urang! Éta wé lamun panggih jeung jurig ogé kalah katingali sok poporongos gancang ngucap paménta! Nomer togél téa lah, nasib téa lah, leuheung mun jeung sopan basa nu merenah! Jalma jaman now mah jiga tas neureuy seprit! Heueuh kitu na mah gara-gara youtuber nu sok maranggil ngemat bangsa urang! ... weuh kasopanan! Kalah silih beja! Angger da pada ngomongkeun satukangeun mah diditu loba jurig! Weuh nu ngahalargaan! Der kalah ditaréang! Life streaming téa! Uji nyali téa! Leuheung lamun urang mun dihalargaan mah ku bangsa manusa, pan rajeun nembongan panasaran meni derr kalah dipadaksa! Dikakalakeun! Antukna jadi bahan lalajoanan jalma réa!
Sahéng. Itu ieu pada-pada nembrakkeun pamanggihna. Saréréa ngarasa teu suka, komo pocong nu kajadian kamari sirahna disundutan petasan! Kunti nu bajuna jadi pungsat dua ramo alatan digunting ku youtuber! Bangsa manusa kiwari weuh kasieun! tara daraék amit atawa ijin leuwih jorok batan bangsa urang! Lamun pucan piceun runtah! Kiih sangeunahna! Sieun keneh ku Bank Émok jeung Kosipa dari pada ka bangsa dedemit mah! Kirang bara meré-méré sasajén! Atuh teu kituna meuleum-meuleum dupa atawa menyan bodas! Sok tibatan jaga dikakalakeun ku sabangsaning ririwa modél maranéhanana. Ayeuna mah sangeunahna nu ménta tulung suwung, komo nu nganteuran susuguh mah lapur pisan.
“Manusa ayeuna mah leuwih sieun ku Bang Émok jeung Kosipa tibatan ku kami!” Ceuk Nyi Kunti bari kurawed.
“Kieu wé atuh. Kumaha mun urang heureuyan sabangsaning manusa nu ipis imanna! Urang bagi tugas! Urang téangan kalemahan bangsa manusa! Urang cangkalak ku saréréa!” Ceuk nu cawigwig nyeuneu. “Kahayangna mun apaleun urang nu nyingkahkeunana mah manusa téh biluk deui ka urang. Ajrih deui ka urang.”
“Sapuk!” Saréréa réang panuju.
“Ké lanan, kumaha urang rék bisa nyangkalak éta manusa nu kandel iman? Panan Si Sujang mah mangkeluk masagi, katelah jawara kahot, sakur bangsa urang nu ngadeukeutan manéhna ogé ngadon taluk ka Si Sujang mah,” ceuk Nyi Kunti kawas nu bingung, sahéng deui bangsa jurig jeung dedemit nuluykeun rapatna.***
Komentar