NGAPRAK LARATAN  13 TAUN KATUKANG MEDALNA  MAJALAH “WARTA SUNDA”

Taun 2007 katukang nalika Sim Kuring leupas ti salasahiji média Sunda wedalan ti Bandung. Lantaran nu jadi dunungan nyaéta Biro/Koordinator Wilayah (Biro/Korwil) peupeujeuh yén keur wilayah Kabupatén Purwakarta mah, media éta téh tong diedarkeun. Ari keur sim kuring mah, salaku wartawanna mah teu tiasa kumaha-kumaha. Ngan nu jadi hariwang téh, mun teu boga média. Asa kumaha kitu!!! Komo deui mun dilapangan mah asa teu genah. Padahal nu namina jurnalis mah tangtu kudu aya média jeung wartana.

Keur mah kaayaan Purwakarta harita téh dina suhu politik keur meujeuhna harénghéng alias keur panas. Tah dina pertengahan Agustus 2007, aya salah sahiji bakal calon Bupati Purwakarta nu ngarangkul sababaraha urang wartawan pikeun nyukseskeun dirina. Nepika sim kuring ogé hampir kataji ku visi jeung misina. Malah mandar nepika sim kuring dipiwarang ngadamel profosal ku bakal calon téh. Nya teu kungsi lila profosal éta téh geus jadi nu diaranan Profosal Majalah Warta Sunda. Nepika profosal éta ku bakal calon kudu dirobah nyatana tina judul média. Malah anjeunna ngusulkeun nerbitkeun Majalah “TUMARITIS”. Basa profosal dicawad tur kudu di robah, pikiran sim kuring, “medalkeun média Sunda nu diaranan Majalah Tumaritis asa ku beurat”, lantaran ari namina Tumaritis téh tempat para gegeden disalah sahiji tempat.

Kuring teu nyaluyuan kana usulan ti bakal calon Bupati éta téh, malah eukeuh yén Warta Sunda sangkan medal. Pokona mah kumaha carana waé!

Dina antara bulan Agustus – September 2007, majalah Warta Sunda medal Édisi : Munggaran nu ukuranna A4, medal unggal dua minggu sakali anu serba sederhana. (Saperti tembong tina gambar arsip Édisi Munggaran). Tina rupa, karedaksian tur layout-tannana ogé can panceg. Nitenan arsip édisi : Munggaran mah, asa can sugema. Tapi ku pangalaman jeung adu renyom ti sakumna civitas para jurnalis anu kahot nepika anu kakoncara dina widangna. Majalah Warta Sunda téh tetep medal sanajan elat-elat ogé.

Kajaba dina medalna ogé seueur kamandang ti parapamaos. Saperti halna kamandang ti Pa Rohimat Alm (Wartawan Manten) harita nuju nguruskeun Yayasan di Notaris Dedi Achmad Haidir di Jalan Sindangkasih sasih Desember 2007. Keur mah sim kuring jeung pihak notaris éta mah sohib tur langganan tetap Warta Sunda. Basa majalah Warta Sunda dipasihkeun ka Pa Notaris, Pa Rohimat maos majalah Warta Sunda bari pokna téh kieu, “Ieu média téh sarua jeung ngaruksak basa hususna Basa Sunda.” Kamandang éta téh teu jadi pundungan atawa jadi pondok harepan. Malah diwaler ku sim kuring, “Ngahaturkeun rewu-rewu nuhun kana kamandang ti Pa Rohimat ngeunaan medal Warta Sunda. Tapi sim kuring ngarumaoskeun seueur kakirangan tina undak-usuk basa komo jeung eusi basa tur karedaksianna mah.” Mangga atuh ka Pa Rohimat anu seueur kaélmuan dina widang Basa Sunda jabung tumalapuk sasarengan pikeun nanjeurkeun kana Kasundaan hususna dina majalah Warta Sunda. Nitenan kamandang Pa Rohimat, ku Sim Kuring janten peurah kana kalumangsungan medalna Warta Sunda.

Kamandang nu leuwih nyungkelit kana ati nalika kamandangna ti Kepala Sekolah nu sején, ningali majalah Warta Sunda ukuran alit téh sok dialungkeun dina handapeun meja, bujeng-bujeng diaos. Éta kamandang téh kulantaran cohag-cohagna kepala sekolah sareng sim kuring. Mugia Kepala Sakola maos ieu warta hamo jeung kungsi nyarita ngalungkeun Warta Sunda disimpen dihandapeun meja éta, neda hapunten. Tapi janten motivasi.

Lian ti éta, aya deui kamandang ti Ketua MKKS SMP nu ayeuna jadi Pengawas SMP di Dinas Pendidikan Kabupatén Purwakarta. Nepika anjeunna teu panuju ayana Média Lokal komo bari jeung ukurannana tur medalna di poto copy mah. Saperti halna harita Warta Sunda medal dina kaayaan nu saperti kitu. Malah teu panujuna ti MKKS SMP téh diwartakeun tur dipénta kamandang ti nara sumber ngeunaan pencekalan terbitna média lokal.

Lain deui, ceuk salah saurang Kepala Sekolah ogé Ketua K3S SD di Kecamatan Sukatani (Dudung Harun, S.Pd) dina peupeujeuhna : “Wios Warta Sunda henteu medal unggal dua minggu, tapi ukuran kedah ageung nu penting terbit unggal sasih, tibatan ukuran alit,” pokna Pa K3S.

Disagedengeun éta ogé, aya nu resep kana medalna Warta Sunda. Malahan aya nu resep tina rubrik contona Béja ti Wanayasa (dina hal rubrik éta téh), redaksi nyugemakeun ti salah sahiji wilayah désa, kecamatan bohna sakola. Dina warta na téh sok dijadikeun salah sahiji barometer keur kecamatan séjén tina kaunggulan sakola nu ngawengku préstasi siswa, guru katut kepala sekolah dina kalumangsungan nanjeurna hiji sakola.

Kalih ti éta pamaos ogé aya nu resepeun rubrik : Undak-usuk Basa, Carpon, Kandaga Budaya Sunda, Bentangna Purwakarta (ieu rohangan kanggo parasiswa tingkat SMP/SMA/SMK/MA),  Kembang Katresna (ieu rohangan kanggo parasiswa tingkat TK/RA/PAUD, SD/MI) jeung sajabana. Rubrik-rubrik éta téh, hasl tina pamundut parapamaos.

Kukituna dina tampilan sareng eusi tur rupa pasti seueur kakirangannana. Tetep Warta Sunda panceg sareng udagan pikeun “Ngamumulé Basa Sunda, Seni katut Cagar Budaya” luyu sareng Perda Gubernur Jawa Barat Taun 2005 Nomer 5,  jeung Nomer 7.

Unggal taun tangtos dina medal ngalaman pasang surut ceuk paribasa mah hirup neut, paéh teu neut. Kitu jeung kitu tiap taunna. Sok sanajan medalna elat-elatan. Boh dina waragad atawa tina ka redaksian, kulantaran jiga na mah teu raresepeun kana majalah Sunda. Hususna wedalan Purwakarta.

Tapi dina dangeut ayeuna Alhamdulillah, Warta Sunda aya nu milu mikanya'ah nepika milu aub dina medalna. Malah ngiringan jabung tumalapuk dina medalna tur ngiringan dina ngamekarkeun ajén-inajén budaya, basa jeung seni Sunda. Mugia dina sasih Agustus 2020 ieu, Warta Sunda medal kalayan aya ridona Gusti pikeun ngeuyeuban kasundaan hususna di tatar Pasundan katut saantero nusantara. Cag.***