SUKATANI – Warta Sunda Nusantara,
|
6 |
2 Urang anggota Gerakan Pramuka Kwarran Sukatani,
nangtukeun kapangurusan anyar. Sok sanajan dina kaayaan pandemic Covid-19,
tetep ngalaksanakeun Musyawarah Ranting (Musran) Gerakan Pramuka Kwartir
Ranting Sukatani Taun 2020 di SDN 1 Ciangting Utara Kecamatan Sukatani
Kabupatén Purwakarta, Senen (28/9/2020).
“Parapamilon sarumanget haladir nerapkeun protokolér kaséhatan nu
ditangtukeun ku pamaréntah. Malah mandar caralikna ogé jaga jarak.” Kitu ceuk
Ketua Panatacalagara Musran Gerakan Pramuka Kwarran Sukatani 2020 ka Warta
Sunda Nusantara.
Dina kasempetan éta ogé pihak Mabiran Sukatani nu diwakilan Endang ZA, dina acara
musran téh miharep sangkan para pamilon tong nepi ka marulang saacan bérés
nangtukeun pangurus anyar.
Lain deui ceuk rengrenga pangurus Kwarran Sukatani, Didin Muhidin,
inyana neda hapunten dina kapangurusan can tiasa ngabagéakeun anggota gerakan
pramuka di Sukatani. Malan ngahaturkeun rewu-rewu nuhun tos dipasihan
kapercantenan dina mangsa bhakti taun 2016-2018 nepika ayeuna purna di
kapangurusan.
Sedengkeun ceuk Ketua Pinilih Musran Gerakan Pramuka Kwarran Sukatani,
Adé Suhayat, dirina sareng kapangurusan nu anyar neruskeun hanca program
katukang. Disagedengeun éta rék merjuangkeun sangkan boga bumi perkemahan di
Sukatani.
Ungkara pupuhu pinilih éta téh dihaminan ku Korwil Dinas Pendidikan Kecamatan
Sukatani, H. Jalaludin dina biantarana nu sakaligus nutup musran Gerakan
Pramuka Kwarran Sukatani. Inyana ngahaminan rék ngupayakeun BUPER Pramuka di
Sukatani. Malah mandar keur koordinasi jeung pihak Muspika Kecamatan Sukatani
tur ngainventaris lahan-lahan di Sukatani.
Acara Musran Gerakan Pramuka Kwarran Sukatani dihadiran ku 62 urang nu ngawengku Kepala
Sekolah jeung guru, Mabiran Sukatani, Kwarran Sukatani, Mabigus Se-Kwarran Sukatani,
Pamong Saka, Jeung DKR Sukatani ***
Komentar